Беларускі народны соннік. Аліна Высоцкая

Нават трохі цікава стала: а вось калі адпаведным чынам выкласці ў сеціва гэту кнігу, ці стане яна аўтарытэтам сярод бясконцай множнасці “соннікаў”? І сам сабе думаю: мабыць жа, не. Бо, сапраўды, няма тут тлумачэнняў пабачанага ў сне смартфона ці выхаду на подыум… А з другога боку, калі разумна карыстацца адвечным, знойдзеш ягоны працяг у сучасным. Вось колькі стагоддзяў лічыцца, што прысніць жанчыне рыбу – да цяжарнасці?

Карацей, хоць перад намі навуковае выданне – гэта, як кажа анатацыя, 2153 аўтэнтычныя запісы аповедаў пра сон: тлумачэнні, апісанні варажбы і абміранняў, перасцярогі і парады, спосабы “закладання” на сон, тым не менш, праўда тут ёсць). У сэнсе, тлумачэнне сноў можна скарыстоўваць і сёння, паверце на слова – сам карыстаюся тымі тлумачэннямі, якія чуў ад мамы.

У любым выпадку, гэта такі важны кавалак нашага культурнага коду, без якога мы нішто як нацыя.

Геаграфічны паказальнік дазваляе звярнуцца да запісаў з канкрэтнага рэгіёну. Паказальнікі сюжэтаў і трыгераў даюць уяўленне пра найважнейшыя вобразы і падзеі ў жыцці беларусаў за апошнія паўтара стагоддзя.

Купляем, кладзём ля ложка, прачынаючыся, шукаем тлумачэнне таму, што прыснілі. І смела крочым у новы дзень – мы ўзброеныя)

В.Г.


Хто б мог падумаць!? Соннік! Менавіта на такую тэму выйшла кніга ў @gutenbergpublisher.

Кніга якая патрабуе ўсяго хвіліну ўвагі і… Вы не выпусціце яе з рук! нават калі будзеце такімі жа саманадзейнымі скептыкамі як я.

Не вельмі веру ў гараскопы, варажбу або прарочыя сны. Але вельмі архаічная і моцная штука – падсвядомасць, яна жыве па сваіх “нерацыянальных” законах.

Што ж, думаю, мне снілася не так даўно? Згадаў, што прысніў здаравеннага і бяздомнага сабаку. І пра сабаку там вельмі шмат – калі сабака нападае, ці там кульгае і г.д. У маім выпадку, я набуду новага прыяцеля. У такія рэчы з ахвотай паверу )

А яшчэ, вы не знойдзеце ў кнізе, напрыклад, сны аб зомбі, або што заблакавалі акаўнт на інст-е ). Бо аўтарка сабрала “салодкі вопыт сненняў” нашых продкаў. І тут цікавы культуралагічны зрэз атрымоўваецца. Якімі вобразамі і страхамі жылі яны, а якімі жывём мы.

І самае важнае. Вы праўда можаце выкарыстоўваць кнігу для тлумачэння сноў (толькі не сніце нічога нанатэхналагічнага і штучнаінтэлектнага). Але, перад усім, гэтая кніга – этнаграфічнае даследаванне. Я б сказаў кніга аб снах нашых бабуль і матуль.

Аўтарка – Аліна Высоцкая – кандыдат навук. Так што кніга ні ў якім разе не тое, аб чым мог бы той-сёй падумаць.

Асобна хочацца звярнуць увагу на якасць друку і дызайн. Папера прыемнай фактуры і тону (я, прызнацца, стаміўся ад газетнай паперы, якая зараз стала ледзь не стандартнай). Вёрстка сучасная. Вось гэты лак, ці як ён там, на вокладцы дае супэрскі жывы эфект.

eliasz_bart

Пакінуць адказ

Ваш адрас электроннай пошты не будзе апублікаваны. Неабходныя палі пазначаны як *